1-800-999-9999 — hi@loremipsum.com

சிக்கன செலவில் நிலத்தடி நீர்த்தொட்டி

வெயில் தகிக்கும் கடும் கோடையாக இருந்தாலும், குளிர் வாட்டும் பனிக்காலமாக இருந்தாலும் வீடுகளில் தண்ணீர் பயன்பாடு கிட்டத்தட்ட ஒரே அளவாகத்தான் இருக்கிறது. வீட்டு உபயோகத்துக்காக தண்ணீரை சேமிப்பது பழைய காலம் முதல் வழக்கத்தில் இருந்து வருகிறது. பெரிய அளவில் மண் பாத்திரங்கள் அல்லது உலோக அண்டாக்கள் வீடுகளில் வைக்கப்பட்டு தண்ணீர் சேமிக்கப்பட்டது. மேலும் பொது இடங்களில் உள்ள குளங்களில் இருந்து தண்ணீரை எடுத்தும் நீருக்கான தேவைகள் பூர்த்தி செய்யப்பட்டது.

‘பிளாஸ்டிக் தொட்டிகள்’

நாகரிகம் வளர்ந்த இன்றைய காலகட்டத்தில் தண்ணீரை சேமிக்க பல வழிகள் கையாளப்பட்டு வருகின்றன. ‘ஓவர்ட் ஹெட் டேங்க்’ எனப்படும் மேல்நிலை நீர்த்தொட்டி, தரை மட்ட அளவில் அமைக்கப்படும் நீர்த்தொட்டிகள் மற்றும் நிலத்தடி நீர்த்தொட்டிகள் ஆகிய மூன்று விதங்களில் நீரை சேமிப்பது வழக்கத்தில் இருந்து வருகிறது. ‘கான்கிரீட்’ அமைப்புகளாக இருந்த தொட்டிகள் பயன்படுத்துவதில் உள்ள எளிமை கருதி தற்போது ‘பிளாஸ்டிக்’ தொட்டியின் வடிவத்துக்கு மாறிவிட்டன. ‘பிளாஸ்டிக்’ தொட்டிகள் இப்போது மிகவும் பிரபலமாக இருப்பதற்கு அவற்றை விரைவாக அமைத்துக்கொள்ளும் வசதியும், குறைவான விலையும் முக்கிய காரணங்களாகும். ‘பிளாஸ்டிக்’ தொட்டிகளின் பல்வேறு வடிவங்கள் பற்றி இங்கே காணலாம்.

பல்வேறு வடிவங்கள்

மேல்நிலை தண்ணீர் தொட்டிகள், நிலத்தடி நீர் தொட்டிகள் மற்றும் ‘செப்டிக் டேங்க்’ எனப்படும் கழிவு நீர் தொட்டிகள் ஆகிய மூன்று வடிவங்களில் ‘பிளாஸ்டிக் டேங்க்’ பயன்படுத்தப்பட்டு வருகிறது. நடுத்தர மக்களிடையே பெரிதும் வரவேற்கப்பட்ட இவ்வகை ‘டேங்க்’ வகைகள் இப்போது அனைத்து தரப்பு மக்களின் வரவேற்பையும் பெற்றிருக்கிறது.

‘பிளாஸ்டிக் செப்டிக் டேங்க்’

கான்கிரீட்டால் மட்டும் அமைத்து, பராமரிக்கப்பட்டு வந்த நிலத்தடி கழிவு நீர்த்தொட்டியானது ‘பிளாஸ்டிக்’ கொண்டு அமைக்கப்படும்போது செலவுகள் பெருமளவுக்கு குறையும். இவ்வகை தொட்டிகளை ஒரு இடத்திலிருந்து இன்னொரு இடத்திற்கு கொண்டு செல்வதும், குறிப்பிட்ட இடத்தில் அமைத்துக்கொள்வதும் எளிது. சரியான இடத்தை தேர்ந்தெடுத்த பிறகு தொட்டியின் அளவை விடவும் ஒன்று அல்லது ஒன்றரை அடி அதிகமாக குழி எடுத்துக்கொள்ளவேண்டும். குழிக்கு அடியில் மணலுடன் சிறிய ஜல்லியை கலந்து சரி சரிமட்டமாக போட்டு அதன்மேல் தொட்டியை வைக்கவேண்டும். தொட்டியின் பாதி மட்டம் வரையில் மணலுடன் கலக்கப்பட்ட சிறுவகை ஜல்லி மண்ணால் நிரப்ப வேண்டும். அதன் பிறகு சாதாரண மண்ணால் நிரப்பலாம். முக்கியமாக தொட்டியின் மூடிகள் சரியாக பொருந்தியிருப்பதை உறுதி செய்துகொள்ளவேண்டும்.

‘பிளாஸ்டிக் ஸ்டோரேஜ் டேங்க்’

வீடுகளில் மேல்நிலை நீர்த்தொட்டிகள் அமைக்க ‘பிளாஸ்டிக் டேங்க்’ பயன்படுத்தப்படுவது பரவலாக நடைமுறையில் இருந்து வருகிறது. அதன் மாறுபட்ட வடிவமாக இப்போது ‘ஸ்டோரேஜ் டேங்க்’ எனப்படும் தொட்டிகள் பயன்பாட்டில் இருந்து வருகிறது. அதாவது சமையலறை, ‘பாத்ரூம்’, அலுவலக குடிநீருக்கான தொட்டி ஆகிய பலவிதங்களில் பயன்படுகிறது. உயர்தரமான ‘பிளாஸ்டிக்’ கொண்டு தயாரிக்கப்படுவதோடு, தேவைப்படும் அளவுகளிலும் கிடைக்கின்றன.

விலை குறைவு   

கழிவு நீரை சேமிப்பதற்காக நில மட்டத்துக்கு கீழே அமைக்கப்படும் ‘பிளாஸ்டிக்’ தொட்டிகளின் விலை அவற்றின் கொள்ளளவை பொறுத்து நிர்ணயிக்கப்படுகிறது. தற்போது ‘பிளாஸ்டிக்’ தொட்டிகள் பல்வேறு மாடல்களில் விற்பனைக்கு வந்துள்ளன. மேல்நிலை குடிநீர் தொட்டி போல நிலத்தடி நீர்த்தொட்டியும் பல வடிவங்களில் இருக்கின்றன. ஒரு லிட்டர் ரூ.6 முதல் விலைக்கு கிடைக்கிறது. அதாவது 1000 லிட்டர் தொட்டியின் விலை ரூ.6000 ஆகும். அதற்கு அதிகமான விலையிலும் இருக்கின்றன. ‘பிளாஸ்டிக்’ தண்ணீர் தொட்டிகளுக்கு குறிப்பிட்ட வருட உத்தரவாதம் தரப்படுகிறது. நடைமுறையில் மேல்மாடியில் வைக்கப்படும் ‘பிளாஸ்டிக்’ தொட்டிகளை விடவும், நிலத்தடி ‘பிளாஸ்டிக்’ தொட்டிகள்தான் அதிக காலத்துக்கு தாக்குப்பிடிப்பதாக கண்டறியப்பட்டுள்ளது.

%d bloggers like this: